Jab bhi utro gay tum paharon se

Jab bhi utro gay tum paharon se

neechay behtay biyaas k kunday

aik pathar milay ga paani mein

jee karay to utha k rakh laina

toot kar ye mien gira tha choti se!!!

Raat paharon par kuch aur he hoti hai

Raat paharon par kuch aur he hoti hai!

aasman bujhta he nahi

aur darya roshan rehta hai

itna zarri ka kaam nazar aata hai falak pay taaron ka

jaisay raat mein "plane" se... Roshan shehar dikhayi daitay hein!

paas he darya aankh pay kaali patti baandh k

pairron k jhurmat mein...

kora jamal shahi , "aayi jumeraat aayi... peechey daikhay shamat aayi"

kanghi rakh k danton mein

awaz kya karti hai hawa

kuch phati phati... jheeni jheeni

baalagh hotay larkon ki tarah

itna ooncha ooncha boltay hein do jharnay aapas mein

jaisay aik dihaat k dost achanak mil kar waadi mein

gaaon bhar ka poochtay hon

nazam bhi aadhi aankhein khol k soti hai

raat paharon par kuch aur he hoti hai!!!!

Rehtang k neeche

Rehtaang k neechey

kohray mein lipti simti ik waadi ko

saara saal he nazla rehta hai

baraf paray to jam jata hai

dhoop paray to phir se behnay lagta hai

saara saal magar es ko halka sa resha rehta hai

Patt jhar mein bhi cheenkon ki ik jharri lagi he rehti hai

cheentay urtay rehtay hein

surak surak karti rehti hai

saara saal he es waadi ko

nazla rehta hai!!!

Achay lagtay hein ye pahaar mujhe

Achay lagtay hein ye pahaar mujhe

chotiyan badlon mein urti hein

paaon barfab behtay pani mein

koot'tay rehtay hein nadiyan

kitni sanjeedgi se jeete hein

kis qadar mustaqil muzaaj hein ye

achay lagtay hein ye pahaar mujhe!

Darya e biyaas jahan behta hai

Darya e biyaas jahan behta hai

es se thori doori par

pandra bees gharon ki aik pahari basti k sirhanay

aalti paalti maray betha

sookha ganja aik pahaar

din mein kitnay saray roop badalta hai!

Subah sath ya aath bajay

sooraj ki aik parchayein , kuch yun parti hein aa kar es k mathay par

jaisay aik tilak dhari saadhu hai jo padam aasan mein , dhiyan lagaye betha hai

neechey ki taraf chitaan ka zakham

thaddi k beecho beech para , haddi ka dabao lagta hai

kabhi kabhi "sailor" lagta hai

badli ka maflar pehne

"daikk" par aa kar ghor se daikh raha hai kitni door ufaq hai

Ooper k dono pathar es dhoop mein "googles" lagtay hein!

Dhoop dhalay phir yun lagta hai

"bull dog" koyi nathno ko phulaye betha hai 

chokanna hai

darya nay agar basti ki taraf kuch reengnay ki kosish ki to

ghur'ra kar es par jhaptay ga

pandra bees gharon ki aik pahari basti k sirhanay

Aalti paalti maray betha

sookha ganja aik pahaar

din mein kitnay saray roop badalta hai!!

Taasraat

Kabhi kabhi lamp post k neechey koi larka

daba k pencil ko ungliyon mein

muray turay kaghazon ko ghutno pay rakh k

likhta huanazar aata hai kahin , to

khayal hota hai , gorki hai!

pajamay uchkay ye larkay jin k gharon mein bijli nahin lagi hai

jo meonispalty k park mein beth kar parha kartay hein kitabein

dakanz k , aur hardi k

navol se gir paray hein

ya prem chand ki kahaniyon ka warq hai koyi , chipak gaya hai

samay palat'ta nahin wahan se

kahani aagay barhi nahin hai

Ye garmiyan kitni pheeki hoti hein , bay sawadi

hatheli pay lay k din ki phaki

Mein phaank leta hun , aur nigalta hun raat k thanday ghont pee kar

Ye sookha sattu halaq se neechey nahi utarta!

Ye khushk din aik garmiyon ka

habs bhari raat garmiyon ki!

Bari taraqi hui hai k , Khonchay wala ab tape

bhar k din bhar chalata rehta hai betri par

"galay ki goli" mazay ki goli , hakeemi chooran , malatthi chooran ,!

Nasein phala k , ya sans ka poora zor day kar

galay se chilanay ki zaroorat nahin rahi ab!

Jo os pay tha , wo yaqeen magar tape par nahin hai!

Na shikayatien na sawal hai

Na shikayatien na sawal hai , Koi aasra na malal hai

Teri bay rukhi bhi kamal thi , Mera zabt bhi kamal hai

Sada kenvas par ubhartay hein buhat se manzar

Saada kenvas par ubhartay hein buhat se manzar

aik sun set hai , pakay phal ki tarah

pilpala rista , raseela sooraj

chiskiyan lita hun har sham labon pay rakh kar

tubkay girtay hein mere kapron pay aa kar es k

Aik imli k ghanay pairr k neechay

school se bhaaga hua bor sa bacha

jis ko teacher nahi achay lagtay

ik gulehri ko pakar k

apni taswerein kitabon ki dikha kar khush hai!

Mere kenvas he k ooper se guzarti hai sarak ik

ik pahiya b nazar aata hai tangay ka mujhe

katkatata hua pahiye mein sira chabak ka

ghoray ki naa'lon se urti hui chingariyon se

saada kenvas pay kayi nuqtay bikhartay hein duein k!

korh ki maari hui burhiya hai ik girjay k bahar

bheek ka piyala sajaye hue , galay ki tarah

mangi rehti hai kheraat "khuda naam" pay sab se

jab dua hoti hai girjay mein to bahar aa kar

beth jaata hai khuda galay pay , ye kehtay hue

aaj kal mandah hai , es naam ki bakri kam hai!!

"qaadiyan" qasbay ki pathar se bani galiyon mein

dulhanein "ultay"  lagay paaon se jab

kalay pathar pay qadam rakhti hui chalti hein

har qadam aag k gul bootay se ban jatay hein!

dair tak chokathon par bethey kanwaray larkay

senktay rehtay hein aankhon k papotay in se!

Neem ka pairr hai ik

neem k neechay kunwa'n hai

dol takrata hua uthta hai jab gehre kunwe'n se

to bazurgon ki tarah gehra kuwa'n bolta hai!

om jhapak jhapak ana alhaq!

om jhapak jhapak ana alhaq!

Sun set

Zara si dair pehle he

Jo sooraj  bas gharoob honay chala tha

ik urtay plane k pahiyon k neechey aatay aatay buch gaya tha

Bidak k hat gaya tha wo

buhat phislan thi aur kaayi jami hui thi badlon ki

pakar k aasman , kosish bhi ki es nay sanbhalnay ki!

Sanbhal nahi paaya wo geelay pairon  par

gira aur ghotay khatay khatay pani mein

ufaq k paar dooba , "ghab gharb ghabash"

abhi tak asmaan par kuch ghisti ungliyon k daagh baaqi hein!!!

Pooran sooraj girhen

College k romance mein aisa hota tha

desk k peechay bethey bethey

chupkay se do hath siraktay

dheere dheere paas aaatay

aur phir aik , achanak pura haath pakar leta tha

muthi mein bhar leta tha

sooraj ne yun he pakra hai chaand ka hath falak mein aaj!!!

Traffic signal

Hont hiltay hein bhikaari k , sunayi nahin daita

haah k lafz uchaltay hein , wo kuch bol raha hai

thaptapata hai har ik caar ka sheesha aa kar

aur ujlat mein hai

traffic k signal pay nazar hai

"change" hai to sahie

kon es garmi mein ab car ka sheesha kholay

agaly signal pay sahie

roz kuch daina zaroori hai , khuda raazi rahay!!!!!!!!!

Mein qedi hoon

Kayi pinjron ka qedi hoon

kayi pinjron mein basta hoon

Mujhe bhaata hai qedein kaatna

Aur apni marzi se chunao kartay rehna

Apnay pinjron ka

Miyadein teh nahi karta mein rishton ki

Aseeri dhoondta hun mein

Aseeri achi lagti hai!!!!!!!

Waqt ko jitna goondh sakay hum

Waqt ko jitna goondh sakay hum ' goondh liya!

Aatay ki mikdaar kabhi barh bhi jaati hai

Bhook magar aik hadd se aagay barhti nahin

Pait k maaron ki aisi he aadat hai....

Bhar jaye to dastar khuwan se uth jatay hein!

Aao ' ab uth jayein dono

koyi kacherhi ka khonta do insano ko

dastar khuwan pay kab tak baandh k rakh sakta hai

qanooni mohron se kab ruktay hein , ya kat'tay hein rishtay

Rishtay rashan card nahi hotay!!!!

Mein fiqray kaat'ta pehle hoon

Mein fiqray kaat'ta pehle hun , phir likhta hun khat esko

Mujhe dar hai

Kahin mein b samaj jaoun na matlab apnay fiqron ka

Meri kaifyatein dil ki

Kahin mujh par na khul jaayein......!

Mujhe dar ye nahi k mein bhula paya nahin esko

Mujhe dar ye hai k wo mujh ko hamesha yaad rakhti hai!!!!

Mujhe afsos hai jaana!!

Mujhe afsos hai jaana!

k meri nazam se ho kar guzartay waqt barish mein

Pareshani hui tmko

Baray bay waqt aatay hein yahan sawan

Meri nazmon ko galiyan yun b aksar bheegi rehti hein

Kayi gadhon mein pani jama rehta hai

Agar paaon paray to moch aajanay ka khatra hai

Mujhe afsos hai lekin

Pareshani hui tmko k meri nazam mein kuch roshni kam hai

guzartay waqt dehleezon k pathar b nahi dikhtay

K mere pairon k naakhun kitni baar tootay hein

hui muddat k chorahay pay ab bijli ka khamba bhi nahi jalta

pareshani hui tmko

Mujhe afsos hai such much!!