Jab gham meri dharkan meri baton se ayyan tha , tu kahan tha

Jab gham meri dharkan meri baaton se ayyan tha , tu kahan tha

Jab charon taraf dard k darya ka sama'n tha , tu kahan tha

Ab aaya hai jab dhal gaye hein sabhi mosam , mere hamdam

Jab tere liye mera har ehsas jawaa'n tha , tu kahan tha

Ab siraf khamoshi hai muqaddar ka sitara , mere yara

Jab lafz pay faqat tera faqat tera biyaan tha , tu kahan tha

Ab aaya hai jab kaam dikha bhi gaya sawan , mere sajan

Jab char soo mere liye khushiyon ka sama'n tha , tu kahan tha

Justice

Yaad hai tum ko............!

Ghar k pichlay lawn mein hum tum

Shab bhar batein kartay hein

Jhagra hota to hum larr kar

Chaand ko munsif kar laitay they

Chaand sada ka paaji hai

Chahay kuch ho

Magar hamesha
Aik he baat kiya karta tha

Teri side liya karta tha

Sulag rahi hein agar batiyan si mujh mein wasi

Sulag rahi hein agar batiyan si mujh mein wasi

Tumhari yaad nay mehka diya , jala b diya

Nostalgia.....

Wo kehti thi..............!

Jayein ja kar shirt utarein

Doosri pehnein

Ye to match nahin karti hai

Jayein ja kar taayi lagayein

Purpal taayi

Shoes to meine raat he polish kar dalay they

Phir ye aap nay kyun pehnay hein

Daikhein socks bhi theik nahin hein

Phir jab mein ye sab kuch kar k chalnay lagta

Os k honton par kiss karta

aur ose bahon mein bharta

Masnooyi ghabrahat orh k sargoshi mein mujh se kehti

Tehrein tehrein

Hoon .....hmm.....Ye khushboo

Thora sa perfume to kar lein

Maana aap buhat saada hein

Lekin jaana!

Office janay se pehlay to

Apnay baal banaya kijiye

aur ab

Meli shirt aur udhra kaaj

Mailay kaalur button khulay hein

Taayi nahin hai shev barhi hai

Baal uljhay hein

Ankhein neend se bojhal hein aur

Jooton par bhi gard jami hai

Es huliye mein ghar se nikla to yaad aaya

Wo kehti thi.......!

Baandh lein hath pay , seene pay saja lein tum ko

Baandh lein hath pay , seenay pay saja lein tum ko

Jee mein aata hai k taweez bana lein tum ko

Phir tumhein roz sanwarein tumhein barhta dekhein

Kyun na aangan mein chanbeli saa laga lein tum ko

Jaisay badlon mein koyi phool chuna karta hai

Ghar k guldaan mein phoolon sa saja lein tum ko

Kya ajab khuwaish uthti hein hamaray dil mein

Kar k mana sa hawao'n mein uchalein tum ko

Es qadar toot k tum pay hamein pyaar aata hai

Apni bahon mein bharein maar he dalein tum ko

Kabhi khuwabon ki tarah aankh k parday mein raho

Kabhi khuwaish ki tarah dil mein bula lein tumko

Hai tumharay liye kuch aisi aqeedat dil mein

Apnay hathon mein duaao'n sa utha lein tum ko

Jaan dainay ki ijaazat bhi nahin daitay ho

Warna mar jayein abhi mar k manaa lein tum koo

Jis tarah raat k seenay mein hai mehtaab ka noor

Apnay tareek makano mein saja lein tum ko

Ab to bas aik he khuwaish hai kisi morr par tum

Hum ko bikhray howe mil jao sanhbalein tumko

Tere Firaq K Lamhay Shumar Kartay Hue

Tere firaq k lamhay shumar kartay howe

Bikhar chalay hein tera intizaar karay howe

To mein b khush hun koyi os se ja k keh daina

Agar wo khush hai mujhe bay qarar kartay howe

Tumhein khabar he nahin hai k koyi toot gaya 

Muhabbaton ko buhat paayedar kartay howe

Mein muskurata hun aainay mein ubhrun ga

Wo ro paray gi achanak singhaar kartay howe

Mujhe khabar thi k ab lout kar na aaoun ga

So tujh ko yaad kiya dil pay waar kartay howe

Wo keh rahi thi samandar nahin hein aankhein hein

Mein un mein doob gaya aitebaar kartay howe

Bhanwar jo mujh mein paray hein wo mein he janta hun

Tumharay hijar k darya ko paar kartay howe

Os ki aankhon mein muhabbat ka sitara hoga

Os ki aankhon mein muhabbat ka sitara hoga

Aik din aaye ga wo shakhs hamara hoga

Tum jahan mere liye seepiyan chunti hogi

Wo kisi aur he duniya ka kinara hoga

Zindagi ab k mera naam na shamil karna

Gar ye teh hai k yahi khel dobara hoga

Jis k honay se meri sans chala karti thi

Kis tarah os k bagher apna guzara hoga

Ye achanak jo ujaala sa hua jata hai

Dil nay chupkay se tera naam pukara hoga

Ishq karna hai to din raat ose sochna hai

Aur kuch zehan mein aaya to khasara hoga

Ye jo paani mein chala aaya sunehri sa gharur

Os nay darya mein kahin paaon utara hoga

Kon rota hai yahan raat k sanaton mein

Mere jaisa he koyi hijar ka maara hoga

Mujh ko maloom hai junhe mein qadam rakhun ga

Zindagi tera koyi aur kinara hoga

Jo meri rooh mein badal se garajtay hein wasi

Os nay seene mein koyi dard utaara hoga

Kaam mushkil hai magar jeet he lun ga os ko

Mere mola ka wasi junhe ishaara hoga

Too Late.....

Aadhi raat k sanatay mein

Kis nay phone kiya hai mujh ko?

Janay kis ka phone aaya hai

Phone utha kar yun lagta hai

Os janib koyi gum sum , gum sum ukhra ukhra

Dheere dheere kaanp raha hai

Mehki hui ik khamoshi hai

Ghup khamoshi

Lekin es khamoshi mien b goonj raha hai
Thandi sansein , barish , aansu
Khamoshi se thak kar os ne saans liya to
Choori khanki......
Uff ye khan khan......
Ik lamhay mein saray badan mein phel gayi hai
Tere elawa koyi nahin hai
Lekin itnay barson baad......

Mujhe sundal kar do

Apnay ehsas se chu kar mujhe sundal kar do

Mein k sadiyon se adhura hun mukammal kar do

Na tumhein hosh rahay aur na mujhe hosh rahay

Es qadar toot k chaho , mujhe pagal kar do

Tum hatheli ko mere pyar ki mehandi se rango

Apni aankhon mein mere naam ka kajal kar do

Es k saaye mein mere khuwab dehak uthein gein

Mere chehray pay chamakta hua anchal kar do

Dhoop he dhoop hun mein toot k barso mujh par

Es qadar barso meri rooh mein jal thal kar do

Jaisay sehraon mein har shaam hawa chalti hai

Es tarah mujh mein chalo aur mujhe thal kar do

Tum chupa lo mera dil oat mein apnay dil ki

Aur mujhe meri nigahon se b ojhal kar do

Masla hun to nigahein na churao mujh se

Apni chahat se tawajjo se mujhe hal kar do

Apnay gham se kaho har waqt mere sath rahay

Aik ehsaan karo es ko musalsal kar do

Mujh pay cha jao kisi aag ki soorat janaa!

Aur meri zaat ko sookha hua jangal kar do!!

Jab bhi utro gay tum paharon se

Jab bhi utro gay tum paharon se

neechay behtay biyaas k kunday

aik pathar milay ga paani mein

jee karay to utha k rakh laina

toot kar ye mien gira tha choti se!!!

Raat paharon par kuch aur he hoti hai

Raat paharon par kuch aur he hoti hai!

aasman bujhta he nahi

aur darya roshan rehta hai

itna zarri ka kaam nazar aata hai falak pay taaron ka

jaisay raat mein "plane" se... Roshan shehar dikhayi daitay hein!

paas he darya aankh pay kaali patti baandh k

pairron k jhurmat mein...

kora jamal shahi , "aayi jumeraat aayi... peechey daikhay shamat aayi"

kanghi rakh k danton mein

awaz kya karti hai hawa

kuch phati phati... jheeni jheeni

baalagh hotay larkon ki tarah

itna ooncha ooncha boltay hein do jharnay aapas mein

jaisay aik dihaat k dost achanak mil kar waadi mein

gaaon bhar ka poochtay hon

nazam bhi aadhi aankhein khol k soti hai

raat paharon par kuch aur he hoti hai!!!!

Rehtang k neeche

Rehtaang k neechey

kohray mein lipti simti ik waadi ko

saara saal he nazla rehta hai

baraf paray to jam jata hai

dhoop paray to phir se behnay lagta hai

saara saal magar es ko halka sa resha rehta hai

Patt jhar mein bhi cheenkon ki ik jharri lagi he rehti hai

cheentay urtay rehtay hein

surak surak karti rehti hai

saara saal he es waadi ko

nazla rehta hai!!!

Achay lagtay hein ye pahaar mujhe

Achay lagtay hein ye pahaar mujhe

chotiyan badlon mein urti hein

paaon barfab behtay pani mein

koot'tay rehtay hein nadiyan

kitni sanjeedgi se jeete hein

kis qadar mustaqil muzaaj hein ye

achay lagtay hein ye pahaar mujhe!

Darya e biyaas jahan behta hai

Darya e biyaas jahan behta hai

es se thori doori par

pandra bees gharon ki aik pahari basti k sirhanay

aalti paalti maray betha

sookha ganja aik pahaar

din mein kitnay saray roop badalta hai!

Subah sath ya aath bajay

sooraj ki aik parchayein , kuch yun parti hein aa kar es k mathay par

jaisay aik tilak dhari saadhu hai jo padam aasan mein , dhiyan lagaye betha hai

neechey ki taraf chitaan ka zakham

thaddi k beecho beech para , haddi ka dabao lagta hai

kabhi kabhi "sailor" lagta hai

badli ka maflar pehne

"daikk" par aa kar ghor se daikh raha hai kitni door ufaq hai

Ooper k dono pathar es dhoop mein "googles" lagtay hein!

Dhoop dhalay phir yun lagta hai

"bull dog" koyi nathno ko phulaye betha hai 

chokanna hai

darya nay agar basti ki taraf kuch reengnay ki kosish ki to

ghur'ra kar es par jhaptay ga

pandra bees gharon ki aik pahari basti k sirhanay

Aalti paalti maray betha

sookha ganja aik pahaar

din mein kitnay saray roop badalta hai!!

Taasraat

Kabhi kabhi lamp post k neechey koi larka

daba k pencil ko ungliyon mein

muray turay kaghazon ko ghutno pay rakh k

likhta huanazar aata hai kahin , to

khayal hota hai , gorki hai!

pajamay uchkay ye larkay jin k gharon mein bijli nahin lagi hai

jo meonispalty k park mein beth kar parha kartay hein kitabein

dakanz k , aur hardi k

navol se gir paray hein

ya prem chand ki kahaniyon ka warq hai koyi , chipak gaya hai

samay palat'ta nahin wahan se

kahani aagay barhi nahin hai

Ye garmiyan kitni pheeki hoti hein , bay sawadi

hatheli pay lay k din ki phaki

Mein phaank leta hun , aur nigalta hun raat k thanday ghont pee kar

Ye sookha sattu halaq se neechey nahi utarta!

Ye khushk din aik garmiyon ka

habs bhari raat garmiyon ki!

Bari taraqi hui hai k , Khonchay wala ab tape

bhar k din bhar chalata rehta hai betri par

"galay ki goli" mazay ki goli , hakeemi chooran , malatthi chooran ,!

Nasein phala k , ya sans ka poora zor day kar

galay se chilanay ki zaroorat nahin rahi ab!

Jo os pay tha , wo yaqeen magar tape par nahin hai!