qitaah

Apni zaat ki khayi hoti hai aur bas!

Tanhai tanhai hoti hai aur bas!

Oski aankhein daikhi tab ye jaan saka

Jheelon mein gehrayi hoti hai aur bas!

Yahi aik rasta baqi raha hai

Yahi aik rasta baqi raha hai

So meine khud ko tanha kar liya hai

Ye tanhai b kitni naram dil hai

Khulay dil se mujhe apnaa liya hai

kabhi b tum na samjho gy meri baat

So meine khud ko he samjha liya hai

Mere ehsas se tere yaqeen tak

Faqat alfaaz he ka faasla hai

Khushi afsos dono aik se hain

Mera adraak in se barh gaya hai

Gurezaan khuwab se hota nahin mein

Magar tabeer ne larza diya hai

Koi kaali ghata si cha rahi hai

Koi kaali ghata si cha rahi hai

Meri tashweesh barhti ja rahi ahi

Wahin halaat hain, lagta hai tareekh

Phir apne aap ko duhra rahi hai

Bhulaye ja rahay hein apna maazi

Hawa har naqsh ko dhundla rahi hai

Meri ankhon ki dhundli khirkiyon par

Judai ki ghari pathra rahi hai

Ye kya mosam mujhe sonpa hai tum ne

Udasi he udasi cha rahi hai

Nihayat

Hamaray darmiyan rehte howe b

Tujhe ehsas he na ho

So mumkin hai

mere jazbay

Tere mayar ko ab tak na punchay hon

Meri yak tarfa chahat he sahie!

Lekin yahi jazbay meri ab tak nihayat hein 

Andar andar soch raha tha qurbani se pehle

Andar andar soch raha tha qurbani se pehle

Kitni bojhal khamoshi thy tughyani se pehle

Tum ne ja kar dil basti ka rasta khol diya tha

Warna har soo abadi thy verani se pehle

Apni hifazat aise karna, jaise sucha moti

Daikho maand nahi par jana tabani se pehle

Saari batein wesi kyun hon jaisi hum chahein

Mushkil b to aa sakti hai asani se pehle

Es ne mujh se pyar kaha tha, sarshari ka pyar

Mujh mein koi chonk gaya tha hairani se pehle

Tu b pyar kar mujh ko

Yahi nahi hai k tu ghamgusaar kar mujh ko

Ba qadr e zarf e muhabbat shumar kar mujh ko

Mein chahta hun k ik baar kaash aisa ho

K tu junoon ki tarah ikhtiyaar kar mujh ko

Mein toot kar kabhi bikhroon samet ly mujh ko

 Hayat phir se nayi dy sanwaar kar mujh ko

Ye zindagi k musalsal khizaan hai tere bagher

So do qadam he sahie chal bahaar kar mujh ko

Mere junoon ka yaqeen kar mujhe to ye b buhat hai

Ye arzoo he nahi tu b pyar kar muh ko

Andesha

Muhabbat dard hai!!!

Aur dard b aisa jo meri jaan ly ly ga

Tumhein ehsas honay tak

Mein kaisay rok sakta hun

K ye to laa dawa hai... So

Tumhein hogi khabar jab tak, to ye he dukh

Tumhari zeest se jeenay k sab saman ly ly ga

Muhabbat dard hai!!!

Aur dard b aisa jo meri jaan ly ly ga

Tumhein kaisay bataoun kin dukhon se mein guzarta hun

Ana ko maar daina kis qadar dushwaar hota hai

Tumharay waastay

Har roz apna khoon karta hun

Tumhein es dard ka halka sa b ehsas ho jaye

To phir ye dukh!!!

Tumharay surkh honton se har aik muskan ly ly ga

Muhabbat dard hai!!!

Aur dard b aisa jo meri jan ly ly ga

Suno! aisa na ho k tum b mujh se hath dho betho

Suno! aisa na ho k rastay mein khud ko kho betho

Suno! k rastay mein to buhat se log miltay hein

Suno! k un ginnat logon ko khud hum chor daitay hein

Kisi imkaan ki khatir

Mujhe dar hai yaqeen ki "ja" koi imkan ly ly ga

Muhabbat dard hai!!!

Aur dard b aisa jo meri jaan ly ly ga

Muhabbat ki koi manzil nahi hai

Samandar hai magar sahil nahi hai

Muhabbat ki koi manzil nahi hai

Mein andekhay Jazeeron pe nikal kar

Dikha doon ga koi mushkil nahi hai

Nazar aata hai ye kuch tamasha

Ye mehfil to meri mehfil nahi hai

Mein kab se day raha hoon khud ko dhoka

Meri dharkan mein tu shamil nahi hai

Saraabi khuwaeshein ly doobti hein

Tammana ka koi hasil nahi hai

janay aisa kyun hota hai

Janay aisa kyun hota hai

Dard ko sehta rehta hoon mein

Apnay andar raakh ki soorat

Jalta aur sulagta hoon mein

Mubhim se ik khuwab ki manind

Toot'ta aur bikharta hoon mein

Mere hissay ki tareeki

Mere bakht mein shamil ho kar

Har manzar dhundla daiti hai

Soch ki har simt achanak

Ik nuqtay par aajati hai

Aur wo nuqta phel k saari

Umeedon ko kha jata hai

To mein es dam aajiz aa kar

Peshani jhuka daita hoon

Ro daita hun

Mujh mein aas jaganay wala

Es ik pal k khali pan ko

Rafta Rafta bhar daita hai

Apni karamat kar daita hai

Apni sift ki aik tajjali

Mujh par zahir kar daita hai

har gham se mamoor mera dil

Khushyon se mayus mera dil

Roshan Roshan ho jata hai

Phir se zinda ho jata hai

Aksar aisa he hota hai

Kuch b nahi

Koi jawab na koi sawal kuch b nahi

So mere zakhan ka ab andy e maal kuch b nahi

Tumharay baad mere pass kya bacha tha bhala

Na aaina na mere khadokhaal kuch b nahi

Mein aur kuch b nahi 2

Meri yaadasht se kharedari ki khushi mein waqiya waqti tor par mehw ho gaya tha lekin raat sonay se pehle walid ne mujh se kaha... Beta .. Jantay ho asal mein bara aadmi kon hota hai miene nafi mein sir hila diya to unhon ne kaha haqeeqi bara aadmi wo hota hai log jiski izzat es ki dolat ya ikhtiyaraat ki waja se nahi kartay balkeh wo logon k dilon mein rehta hai.....Es ka hukam logon k dilon par chalta hai mujhe inki baat samaj to nahi aayi magar pata nahi kyun , Achi zaroor lagi
                         Phi aahista aahista mujhe es baat ki samaj aanay lagi. Han agar aap logon k dil mein jaga bana sakein to apki ehmiyat hai warna nahin. Tab meine daikha k ziyada tar log likhne parhne walon ko pasand nahi kartay hein, So meine b parhna shorou kar diya. Qudrat ki meharbani se mujhe kuch is tarah k logon ka sath b naseeb ho gaya k jo danishwar to nahi lekin es qabeelay se talluq rakhtay they, In mein sab se pehle mere walid jo mere buhat achay dost b hein Phir adnan tabish jo ab kisi akhbar se wabasta hein pehle sher kehtay they magar phir najanay kyun sher goi tarak kar di.Jameel haider zaidi Jin ko mein kabhi faramosh nahi kar sakta unhon ne mujhe hamesha aik baray bhai aur mukhlis dost ki haisyat semeri har maamlay mein rehnumayi ki, Khud b baray achay sher kehte hein, Meri bunyadi Insiration inhe se hai, Phir Zia Khan Zia maroof shayer jin se hamesha nayaz mandi rahi in ki b muhabbat aur khuloos ne mujhe na sirf hamesha qeemti mashwaron se nawaza balkein hata ul imkan madad b ki, Inhi k tawasut se kehna shayer muhtaram rafi ud din raaz se mulaqatein howi. rafi ud din raaz se kabhi kabhi islaah aur pazerayi milti rahi . Yun mera shouq apni irtaqayi manazil teh karta raha aur aaj mein ALLAH ki meharbani aur deegar doston ki hosla afzayi ki waja se es kitab ko mukammal karnay mein kamyaad ho saka hun (Shakeel Ahmad)

Mein aur kuch b nahi

Ye in dino ki baat hai jab abhi mujhe likhna b nahi aata tha, Meri dadi jab b mujhe likhte parhte daikhtiein to wo aksar kaha karti k mera beta "Bara aadmi banay ga" wo parhi likhi nahi thein. magar  najanay kyun in k shaoor la shaoor mein ye baat thy k inhein apnay potay ko bara aadmi banana hai. aksar ye jumla in k mun se sun kar mein ne aik din in se poocha tha k bara aadmi kaisa hota hai.Inkay khayal k mutabiq bara aadmi wo hota hai jis k aagay peeche buhat se log hotay hein jo es ka hukam mantay hein aur wo buhat  paisay aur ikhtiyaraat wala hota hai.
         Mere zehan mein baray aadmi ki aik ajeeb c tasweer ubharnay lagi. Phir aik roz yun hua k mein apnay walid k sath eid ki kharedari karnay bazaar gaya wahan meine daikha k aik police ahalkaar safaid coton  mein malboos saada libaas mein, hath mein baid liye rerri walon par hukam chala raha hy,  kisi ko aagay aur kisi ko peeche rehne k liye keh raha hai, aur kuch log tamasha daikhne ki gharz se es k ird gird kharay ho gaye hein, mein b isay tiktaki bandhe daikhne laga.mere tasawur k mutabiq baray aadmi se es ahalkaar ki shabeeh match kar rahi thi shayad es liye mien esay daikhnay mein aisa meh huw k walid sahib kisi aur taraf chalay gaye aur mein whain khara raha kafi dair k baad wo mujhe talssh kartay hue aaye to mein es waqt b es ahalkaar ko he daikh raha tha, mujhe nahi maloom wo mujhs e kab se mukhatib thay jab unhon ne mujhe bazoo se pakar kar jhanjhora to jaise mein hosh mein aaya. unhon ne hairat aur qadray ghussay se mujh se poocha..... Kya baat hai kahan kho gaye ho shayad kafi dair guzar chuki thi. mere walid sahib ne mere andaz ko bari ahmiyat di aur mujhe aik hotal ki taraf le gaye.kyun k ab roza khulnay ka waqt ho chuka tha unhon ne chand khajoorein aur pakoray liye aur mere  paas foothpath par he baith gaye aur poochnay lagay k mein kya daikh raha tha to meine baray aadmi wali baat inhein batayi, mujhe yaad hy wo dair tak hanstay rahay magar unhon ne kuch kaha nahi phir hum shopping mukammal kar k ghar aaa gaye.(Shakeel Ahmad)