Bojh

Pairon par liye phirta hun mein bojh ye kaisa

Shayad badan rakh k kahin bhool gaya hun

Muhabbat yun b hai shayad

Muhabbat aag hoti ja rahi hai

Koi jugnoo, koi roshan sitara

Mere man mein sulagta ja raha hai

Mein apne aap se bichra to socha

Jo tum ko mujh se kehni thi wahi baat

Buhat baylaag hoti ja rahi hai

Muhabbat aag hoti ja rahi hai

Kahin par roshni ka istiaara

Kahin roshan kahin madham nazara

Kahin par bay karaan sehra pukara

Kahin waazeh, kahin mubhim ishara

Ye kaisi raat hai jis ka nahi ant

Samandar hai nahi jis ka kinara

Ye deepak aag hoti ja rahi hai

Muhabbat aag hoti ja rahi hai

Tanhai

Mein apni zaat ki tanhai se guzar aaya

Pull e siraat tha shayad jo paar kar aaya

jahan sapna nahi hota

Kabhi darya nahi hota

Kabhi piyasa nahi hota

Sadayein lout aati hein

Dareecha wa nahi hota

Ham he katra k guzray hein

Hamein dhoka nahi hota

Muhabbat phel jaye to

Kahin sehra nahi hota

Hai koi aankh aisi b

Jahan sapna nahi hota

Talab ho doob janay ki
Ghara kacha nahi hota

Tumhara naam na aata
ye dil dharka nahi hota

Qitaa

Ye faisla nahi hota rahun khamosh k phir

Mein itni zor se cheekhun sunayi dainay lagun

Mata e zeest mere pas ik khalash he to hai

So umer bhar ki mein kaisay kamayi dainay larun

Wazahat

Haseen larki!

Tumhein ye gham hai

K bayniazi mera chalan hai

Nahi hai aisa to kuch nahi hai

Meri tawajo to but gayi hai

Magar mein tum se alag nahi hun

Mere khayalon mein kal b tum thein

Mere khayalon mein ab b tum ho

Mere khayalon mein tum raho gi

Mein in khayalon ko lafz o mayni k perahan se saja raha hun

Shareer larki!

Ye jan rakho

Mein kitni sadyon se lafz chun kar tumhari khatir

Naye mayni talashta hun, mein apne izhar ka tawasat

Faqat rawaiye ko janta hun.....tmhari khuwaish!!!

Tmhari khuwaish yahi rahi hai

Mein lafz o mayni ka khel chorun

Ajeeb larki!

Zara ye samjho

Ye khel he meri zindagi hai

So meri ye zindagi b janaa

Tumhari apni he zindagi hai

Agar kaho to ye khatam kar dun?

Tum b mun pher lo to jaoun mein

Kab talak khud ko azmaoun mein

Tum b mun pher lo to jaoun mein

Roshni ko diye jalaoun mein

jab b tere qareeb aaoun mein

Zindagi, arzoo, umeed, fareb

Aur kab tak fareb khaoun mein

Mera maazi meri haqeeqat hai

Kaisay maazi ko bhool jaoun mein

Kya haqeeqat hai kya kahani hai

Kon samjhay agar bataoun mein

Sochta hun shakeel aaj k baad

Khud ko dhoondhun k osko paoun mein

Qitaa

Bazahir to har ik manzar bhala hai

Har ik manzar ko pas manzar se samjho

Koi b faisla karnay se pehle

Khud apnay aap ko andar se samjho

Fasal boyi pathar ki

Aitebaar sheeshay ka, imtihan sheeshay ka

Daikho khel mat karna, meri jaan sheeshay ka

En dino jahan hum hein hum ko aisa lagta hai

Hai zameen sheeshay ki, Aasman sheeshay ka

Tootna to hai aakhir, tootnay se kya darna!

Pathron ki basti mein kya dhiyan sheeshay ka

Hun b kitne saada hein dhoop se bachao ko

 Sar pay taan rakha hai saaebaan sheeshay ka

Shehar hai muhabbat ka aur hairti hon mein

Har makeen sheeshay ka, har makan sheeshay ka

Juzz mere batao to aur kon day sakta

Fasal boyi pathar ki aur lagaan sheeshay ka

Mein nahi janta magar shayad

Mein nahi janta magar shayad

Aagehi aap he ujala hai

Aagehi nay mujhe jala bakhshi

Aagehi ne he maar daala hai

Mehdood

Dard k khuwab daikhnay walo

Kon apni hadon se guzra hai?

Aagehi k azab daikhne walo

Aisa ik dildaar hona chahye

jeet aisi haar hona chahye

Tum se ye takrar hona chahye

Soch lena maslay ka hal nahi

Jurat e izhar hona chahye

Sehal ho jaye to by maqsad hayat

Zindagi dushwaar hona chahye

Senkron ayyar hein duniya mein, hon

Aap ko hoshiyaar hona chahye

Azmatein marhoon hein kirdar ki

Aap ka kirdar hona chahye

Kefiyat dil ki samaj ly jo shakeel

Aisa ik dildar hona chahye

Aik tum he to ho

Aik tum he to ho

Meine jis k liye

Khuwab sapnay sajaye

Saray jag se siwaa

Geet ulfat k gaaye

Jis ko socha buhat

Soch ki akhri had talak

Jis ko daikha basarat ki had se paray

Wo tasawur tha ya khuwab tha kya pata?

Es qadar naqsh hai  zehan mein

Tumhara aks haseen

Koi khalwat k jalwat

Kahan tum nahin

Shaam k surmayi badlon ki tarah

Tum nay lamha ba lamha safar yun kiya

Meri ankhon se dil

Mere dil mein rahay

Dil se nas nas mein tum

Khoon ban kar bahay

Jis jaga tak meri soch ja na saki

Tum wahan tak gaye

Aur kis ko diya

Mein nay ye ikhtiyaar

Es qadar kis e pyar?

Aik tum he to ho 

Najanay kyun

Muhabbat jeet sakti hai

Magar phir b najanay kyun?

Muhabbat haar jati hai

Aik sher

Tum ko maine daikha jab kya ajeeb lamha tha

Chamki aik khuwaish si char soo andhere mein

To phir kya chor dain jeena

waraye aagahi koi agar tayyar ho jaye

Jo hona hai meri qismat mein aik baar ho jaye

Muhabbat dard ki had se guzar jaye to mumkin hai

Dikhayi dy sar e manzar koi shahkaar ho jaye

Tawalat wo safar mein ho, koi manzil na mil paaye

Jahan se rasta niklay, wahin deewar ho jaye

Ajab dastoor e duniya hai ajab iska tamasha hai

Mera asbaat mumkin hai mera inkaar ho jaye

Kathan hai zindagi aur rastay b khaar se pur hein

To phir kya chor dein jeena agar dushwar ho jaye

Mere khuwaish guzeeda tan samaj lay baat itni si
Kabhi khud say b to jo bar sar e paikaar ho jaye

Dama dam mast k naaray suanyi dein har ik janib se
Elahi hum ghareebon ka b baira paar ho jaye

Tasawur mein mujhe tum ne bulaya hai to mein aaya

Tasawur mein mujhe tum ne bulaya hai to mein aaya

Ye rasta b mujhe tum  ne dikhaya hai to mein aaya

Buhat muddat hui mein mar chuka tha ak tmharay bin

So ab tum ne mujhe phir se jalaya hai to mein aaya

Tumharay khuwab such karna yahi meri tamanna hai

Kabhi tum ne koi sapna sajaya hai to mein aaya

Tumhein takleef mein daikhun kahan itni sakkat mujh mein

Tumhara dil kisi ne jab dukhaya hai to mein aaya

Tumhari aankh se behtay hue aansu sitaray hein

Kabhi tum ne koi aansu bahaya hai to mein aaya

Tazabzab

Tum khuwaish ho 

Tum aik aisi khuwaish ho jo

Kabhi na poori ho paye gi

Janta hai dil

Manta hun mein

"Lekin" Es se kya hota hai?

"Shayad" Meri khuwaish b hai

"Lekin" aur "Shayad" nay mujh ko

bay waja uljha rakha hai

Mere sath ye dewana jaye

Mein jahan jaoun mere sath ye dewana jaye

Meri pehchan mere dard ka afsana jaye

Wo nazar oski hai jadu wo talisim oski ada

Jis taraf daikh ly saqi, wahin paymana jaye

Mujh ko sehra ki zaroorat nahi mein qais nahi

Mein to jis shehar b jaoun wahin verana jaye

Lutf peene ka b aaye ga esi bin mein mujhe

Raqs karta hua khud he wahan mehkhana jaye

Mujh se nazrein to milao mujhe daikho to sahie

Ab nahin meri tamanna mujhe pehchana jaye

Kon kisay samjha sakta hai

Sooraj to jhulsa sakta hai

Diya b aag laga sakta hai

Mein he kyun awaz esay dun

Wo khud b to asakta hai

Sab ko dhoka dainay wala

Khud b dhoka kha sakta hai

Wo chahay to tanhai ko

Mujh se door bhaga sakta hai

Aik he baat samaj mein aayi

Kon kisay samjha sakta hai

Rawaiye

Rawaiye aainay hotay hein jazbon k

Kabhi maa apne bachon se nahi kehti 

Wo in se pyar karti hai

Na behnein bhaiyon ko ye btati hein

Wo inko kitna chahti hein

Na bhai apni behno se kabhi izhar kartay hein

Wo in se pyar kartay hein!!!

Magar han ye rawaiye he batatay hein

Kisay kis ki zaroorat hai

Kisay kis se muhabbat hai