tere galay mein jo banhon ko daal rakhtay hein

Tere galay mein jo banhon ko daal rakhtay hein

Tujhe mananay ka kaisa kamaal rakhtay hein

Tujhe khabar hai tujhe sochnay ki khatir hum

Buhat se kaam muqaddar pay taal rakhtay hein

Koyi bhi faisla hum soch kar nahin kartay

Tumharay naam ka sikka uchaal rakhtay hein

Tumharay baad ye aadat si ho gayi apni

Bikhartay sookhtay pattay sanbhal rakhtay hein

Khushi si milti hai khud ko aziyatein day kar

So jaan boojh k dil ko nidhaal rakhtay hein

Kabhi kabhi wo mujhe hans k daikh laitay hein

Kabhi kabhi mera bay had khayal rakhtay hein

Tumharay hijar mein ye haal ho gaya apna

Kisi ka khat ho ose bhi sanbhal rakhtay hein

Khushi milay to tere baad khush nahin hotay

Hum apni aankh mein har dam malal rakhtay hein

Zamanay bhar se bachaa kar wo apnay aanchal mein

Mere wajood k tukray sanbhaal rakhtay hein

Kuch es liye bhi to bay haal ho gaye hum log

Tumhari yaad ka bay had khayal rakhtay hein

Ik aanchal se bandha hai sab kuch

Aik aanchal se bandha hai sab kuch

Aik tasweer

Aur tasweer ye bheegay howe hont

Aik sundal ki anabi pencil

Aik bay rabt saa ukhra hua khat

Aik adad card

Jis ko choonay se teri yaad chali aayi hai

Aur es card mein rakhi howi aqloti palak

Jis se maanoos duaaon ki mehak aati hai

Kisi gumnaam se shayer ka adhura misra'a

Aik paazaib se bichra hua ujla moti

Ik murjayi howi zard chanbeli ki kali

Jis mein ab bhi teri zulfon k bhanwar liptay hein

Aik boseeda Question paper

Jis k konay pay likha naam abhi taaza hai

Sharbati kaanch ki tooti howi naazuk choori

Aik toota hua halka sa gulabi naakhun

Aik gadla sa tissue paper bhi

Jis pay mehkay howe ashkon k nishaa'n zinda hein

yahi dolat hai yahi kuch hai asasa mera

Aik aanchal se bandha hai sab kuch

Hasrato'n , siskiyon , aaho'n mein sameta aanchal

Teri khushboo mere ashkon mein lapeta aanchal

                     Aik aanchal se bandha hai sab kuch

                                            Aik bheegay howe aanchal se bandha hai sab kuch

Janaa ! tum aanay wali ho

Jab se ye pegham mila hai

Janaa ! tum aanay wali ho

Mosam nay saray ghar ki tarteeb badalkar rakh daali hai

chokhat pay ik chand bhi aa kar beth gaya hai

Kayi sitaray laaounj mein kab se paray howe hein

Kehtay hein k

Es rastay se tum guzro gy

Nanhay munnay kayi gulabon ka kehna hai

Jitnay din tum paas raho gy

Ghar k har konay mein aa kar wo mehkein gein

Phoolon nay mil kar sab konay baant liye hein

Jugnoo kab se chat pay  , ghar k

Har goshay mein chamak rahay hein

Sooraj aur baarish bhi kal se saaiyban par tikay howe hein

Dheemay dheemay chehak rahay hein

Shaam to kab se kayi tarah k mosam lay kar

Es kamray mein ruki hui hai jis kamray mein tum thehro gy

Tum aao gy to ye shaam hazaron mosam

Sundar sundar saji howi aankhon ko dy kar

Kho jaye gi

Phir na kabhi wapis aaye gi

Es se pehlay k ye shaam b

Saaray mosam lay kar mujh ko khaali kar k kho jaye

Tum aa jao naa !

Abhi aaa jao............!!!1

Hum se kya poochtay ho hijar mein kya kartay hein

Hum se kya poochtay ho hijar mein kya kartay hein

Tere lout aanay ki din raat dua kartay hein

Ab koyi hont nahin en ko churanay aatay

Meri aankhon mein agar ashk hua kartay hein

Teri tu janay , par ay jaan e tammana hum to

Saans k saath tujhe yaad kiya kartay hein

Tu he pehlu mein nahin warna december mein wahin

Dhoop mein beth k akhbaar parha kartay hein

Kabhi yaadon mein tujhe banhon mein bhar laitay hein

Kabhi khuwabon mein tujhe choom liya kartay hein

Teri tasweer laga laitay hein hum seenay se

Phir tere khat se teri baat kiya kartay hein

Gar tujhe chornay ki soch bhi aaye dil mein

Hum to khud ko bhi wahin chor diya kartay hein

Aaj hamein ye baat samaj mein aayi hai

Aaj hamein ye baat samaj mein aayi hai

Tum mosam ho , aur mosam harjayi hai

Tu nay kaisay mor pay chor diya mujh ko

Dil ki baat chupaoun to ruswayi hai

Tere baad bucha he kya hai jeevan mein

Mein hun , bheegi shaam hai , aur tanhayi hai

Aaj meri aankhon mein sawan utray ga

Aaj buhat din baad teri yaad aayi hai

Aaj ki raat buhat bhari hai dono par

Aaj mujhe wo khat loutanay aayi hai

Janay mein kya soch k chup hun gum sum hun

Janay wo kya soch k waapis aayi hai

Ye mehman nawazi hai ya aur hai kuch

Mere liye wo chaay bana kar laayi hai

Jaan se maar dy mujhe lekin

jaan se maar dy mujhe lekin

Chor janay ka mujh par zulm na kar

Tum meri kon ho!!!!

Tum meri kon ho tum se hai tal'luq kaisa?

                           Tum kisi dhund mein lipti howi tanhayi ho

                           Meri shohrat ho dua ho meri ruswayi ho

                           Baat karti ho kabhi chup mein bikhar jati ho

                          Kyun meri roohk goshon pay sitam dhaati ho

Tum meri kon ho tum se hai tal'luq kaisa?

                         Gungunati ho to mehsoos ye hota hai mujhe

                         Jaisay daryao'n k saahil se sadaa aati ho

                         Paas aata hun to khuwabon mein utar jaati ho

                         Door jata hun to daman se lipat jati ho

Tum mere paas hoan door ho mere dil se

Tum mere paas hona door ho mere dil se

Tum meri kon ho tum se hai tal'luq kaisa?

Tumhari yaad se har pal saja hua campus

Tumhari yaad se har pal saja hua campus

Mein kya karun k bhula he nahi saka campus

Udaas nehar mein tum paaon dalay rakhti thein

Tumharay baad udaasi mein dhal gaya campus

Najanay kon yahan os ka kho gaya ho ga

Kisi ki aakhri sanson mein thi dua , campus

Jo main nay hilye ki sarkon pay tum ko yaad kiya

Tumhein khabar hai mere saath ro para campus

Kisi nay tujh mein guzaray hein itnay saal yahan

So mein rahoon na rahoon to sadaa campus

Har ik department se es k qehqahay goonjay

Mein es k baad wasi jab kabhi gaya campus

Dil mein bikhray howe jalon se pareshan na ho

Dil mein bikhray howe jalon se pareshan na ho

Mere guzray howe saalon se pareshan na ho

Meri awaaz ki talkhi ko gawara kar lay

Mere gustaakh sawalon se pareshan na ho

Mein nay maana teri aankhein nahin khulti hein magar

Din nikalnay day , ujalon se pareshan na ho

Apni zulfon mein utarti howi chaandi ko chupa kar

Mere bikhray howe baalon se pareshan na ho

Ay nayi dost mein bhar poor hua hun tera

Mere maazi k hawalon se pareshan na ho

Daikh yoon door na ho mujh ko laga lay dil se

Tu meri rooh k chalon se pareshan na ho

Khud ko veeran na kar mere liye , jaan meri

In pareshaan khayalon se pareshan na ho

Kahin charagh roshan hein , kahin pay madham hein

Kahin charagh roshan hein , kahin pay madham hein

Tumharay aanay k imkaan hein , magar kam hein

Mein lout'tay howe chupkays se chorr aaya tha

Tumharay takiye pay mere hazaar mosam hein

Tumharay paaon ko choo kar zamana jeet liya 
Tumharay paaon nahin hein , aik aalam hein

Muhabbatein howi taqseem to ye bhaid khula
Hamaray hissay mein khushiyan nahin hein, matam hein

Kuch isi liye bhi hamein dukh se dar nahin lagta
Hamari dhaal tere dard hein , tere gham hein

Abhi kaho , to abhi , ye bhi tum ko day dein gein
Hamaray paas jo ginti k aik do dam hein

Abhi khulein gein bhala kaisay kaiynaat k raaz
Teri kamar mein kayi morr hein , kayi kham hein 

Jab gham meri dharkan meri baton se ayyan tha , tu kahan tha

Jab gham meri dharkan meri baaton se ayyan tha , tu kahan tha

Jab charon taraf dard k darya ka sama'n tha , tu kahan tha

Ab aaya hai jab dhal gaye hein sabhi mosam , mere hamdam

Jab tere liye mera har ehsas jawaa'n tha , tu kahan tha

Ab siraf khamoshi hai muqaddar ka sitara , mere yara

Jab lafz pay faqat tera faqat tera biyaan tha , tu kahan tha

Ab aaya hai jab kaam dikha bhi gaya sawan , mere sajan

Jab char soo mere liye khushiyon ka sama'n tha , tu kahan tha

Justice

Yaad hai tum ko............!

Ghar k pichlay lawn mein hum tum

Shab bhar batein kartay hein

Jhagra hota to hum larr kar

Chaand ko munsif kar laitay they

Chaand sada ka paaji hai

Chahay kuch ho

Magar hamesha
Aik he baat kiya karta tha

Teri side liya karta tha

Sulag rahi hein agar batiyan si mujh mein wasi

Sulag rahi hein agar batiyan si mujh mein wasi

Tumhari yaad nay mehka diya , jala b diya

Nostalgia.....

Wo kehti thi..............!

Jayein ja kar shirt utarein

Doosri pehnein

Ye to match nahin karti hai

Jayein ja kar taayi lagayein

Purpal taayi

Shoes to meine raat he polish kar dalay they

Phir ye aap nay kyun pehnay hein

Daikhein socks bhi theik nahin hein

Phir jab mein ye sab kuch kar k chalnay lagta

Os k honton par kiss karta

aur ose bahon mein bharta

Masnooyi ghabrahat orh k sargoshi mein mujh se kehti

Tehrein tehrein

Hoon .....hmm.....Ye khushboo

Thora sa perfume to kar lein

Maana aap buhat saada hein

Lekin jaana!

Office janay se pehlay to

Apnay baal banaya kijiye

aur ab

Meli shirt aur udhra kaaj

Mailay kaalur button khulay hein

Taayi nahin hai shev barhi hai

Baal uljhay hein

Ankhein neend se bojhal hein aur

Jooton par bhi gard jami hai

Es huliye mein ghar se nikla to yaad aaya

Wo kehti thi.......!

Baandh lein hath pay , seene pay saja lein tum ko

Baandh lein hath pay , seenay pay saja lein tum ko

Jee mein aata hai k taweez bana lein tum ko

Phir tumhein roz sanwarein tumhein barhta dekhein

Kyun na aangan mein chanbeli saa laga lein tum ko

Jaisay badlon mein koyi phool chuna karta hai

Ghar k guldaan mein phoolon sa saja lein tum ko

Kya ajab khuwaish uthti hein hamaray dil mein

Kar k mana sa hawao'n mein uchalein tum ko

Es qadar toot k tum pay hamein pyaar aata hai

Apni bahon mein bharein maar he dalein tum ko

Kabhi khuwabon ki tarah aankh k parday mein raho

Kabhi khuwaish ki tarah dil mein bula lein tumko

Hai tumharay liye kuch aisi aqeedat dil mein

Apnay hathon mein duaao'n sa utha lein tum ko

Jaan dainay ki ijaazat bhi nahin daitay ho

Warna mar jayein abhi mar k manaa lein tum koo

Jis tarah raat k seenay mein hai mehtaab ka noor

Apnay tareek makano mein saja lein tum ko

Ab to bas aik he khuwaish hai kisi morr par tum

Hum ko bikhray howe mil jao sanhbalein tumko

Tere Firaq K Lamhay Shumar Kartay Hue

Tere firaq k lamhay shumar kartay howe

Bikhar chalay hein tera intizaar karay howe

To mein b khush hun koyi os se ja k keh daina

Agar wo khush hai mujhe bay qarar kartay howe

Tumhein khabar he nahin hai k koyi toot gaya 

Muhabbaton ko buhat paayedar kartay howe

Mein muskurata hun aainay mein ubhrun ga

Wo ro paray gi achanak singhaar kartay howe

Mujhe khabar thi k ab lout kar na aaoun ga

So tujh ko yaad kiya dil pay waar kartay howe

Wo keh rahi thi samandar nahin hein aankhein hein

Mein un mein doob gaya aitebaar kartay howe

Bhanwar jo mujh mein paray hein wo mein he janta hun

Tumharay hijar k darya ko paar kartay howe

Os ki aankhon mein muhabbat ka sitara hoga

Os ki aankhon mein muhabbat ka sitara hoga

Aik din aaye ga wo shakhs hamara hoga

Tum jahan mere liye seepiyan chunti hogi

Wo kisi aur he duniya ka kinara hoga

Zindagi ab k mera naam na shamil karna

Gar ye teh hai k yahi khel dobara hoga

Jis k honay se meri sans chala karti thi

Kis tarah os k bagher apna guzara hoga

Ye achanak jo ujaala sa hua jata hai

Dil nay chupkay se tera naam pukara hoga

Ishq karna hai to din raat ose sochna hai

Aur kuch zehan mein aaya to khasara hoga

Ye jo paani mein chala aaya sunehri sa gharur

Os nay darya mein kahin paaon utara hoga

Kon rota hai yahan raat k sanaton mein

Mere jaisa he koyi hijar ka maara hoga

Mujh ko maloom hai junhe mein qadam rakhun ga

Zindagi tera koyi aur kinara hoga

Jo meri rooh mein badal se garajtay hein wasi

Os nay seene mein koyi dard utaara hoga

Kaam mushkil hai magar jeet he lun ga os ko

Mere mola ka wasi junhe ishaara hoga

Too Late.....

Aadhi raat k sanatay mein

Kis nay phone kiya hai mujh ko?

Janay kis ka phone aaya hai

Phone utha kar yun lagta hai

Os janib koyi gum sum , gum sum ukhra ukhra

Dheere dheere kaanp raha hai

Mehki hui ik khamoshi hai

Ghup khamoshi

Lekin es khamoshi mien b goonj raha hai
Thandi sansein , barish , aansu
Khamoshi se thak kar os ne saans liya to
Choori khanki......
Uff ye khan khan......
Ik lamhay mein saray badan mein phel gayi hai
Tere elawa koyi nahin hai
Lekin itnay barson baad......

Mujhe sundal kar do

Apnay ehsas se chu kar mujhe sundal kar do

Mein k sadiyon se adhura hun mukammal kar do

Na tumhein hosh rahay aur na mujhe hosh rahay

Es qadar toot k chaho , mujhe pagal kar do

Tum hatheli ko mere pyar ki mehandi se rango

Apni aankhon mein mere naam ka kajal kar do

Es k saaye mein mere khuwab dehak uthein gein

Mere chehray pay chamakta hua anchal kar do

Dhoop he dhoop hun mein toot k barso mujh par

Es qadar barso meri rooh mein jal thal kar do

Jaisay sehraon mein har shaam hawa chalti hai

Es tarah mujh mein chalo aur mujhe thal kar do

Tum chupa lo mera dil oat mein apnay dil ki

Aur mujhe meri nigahon se b ojhal kar do

Masla hun to nigahein na churao mujh se

Apni chahat se tawajjo se mujhe hal kar do

Apnay gham se kaho har waqt mere sath rahay

Aik ehsaan karo es ko musalsal kar do

Mujh pay cha jao kisi aag ki soorat janaa!

Aur meri zaat ko sookha hua jangal kar do!!