Senkron baar ginay they main nay

Senkron baar ginay they main nay

jaib mein no (9) he kanchay they

aik jaib se doosri jaib mein rakhtay rakhtay

ik kancha kho betha hun!

na haara , na gira kahin par 

"ploto" mere asman se ghayab hai!!

Ik naqal tujhe bhi bhejun ga

Ik naqal tujhe bhi bhejun ga

ye soch k he.....

tanhayi k neechey karban paper rakh k mein

oonchi oonchi awaaz mein batein karta hun

Alfaaz utar aatay hein kaghaz par lekin

awaaz ki shakal utarti nahin

raaton ki seyahi dikhti hai!!!

Ik peepal tha

kehtay hein ik peepal tha

ooper wali baraf ki choti se utra tha

kundli maar k dhoop mein ik darya soya tha

es par paaon para aur peepal..... thehar gaya!!

sooraj nay daikha , darya ki aankh mein peepal ki tasweer utar aayi thi

darya din bhar gun gun karta rehta tha

raat ko karwat lay kar , peepal k zaanu par sar rakh kar socha karta tha

kaash khara ho sakta wo b pairon par

aur galay lag sakta uth kar peepal k!

ik sindhoori shaam kamar lehrati hui

dono k beech se ho kar roz nikalti thi!

jab kuch sadiyan beet gayi

aur asman k baal b kanpatiyon k neeche paknay lagay

aik roz es chikni shaam ka hath pakar kar peepal nay roka es ko... sun!

kyun mun kaala karnay jati hai tu roz isi sooraj k

peeche peeche... paar ufaq k!

laali phir gayi shaam k mun par

shaakh se patta tor k

likh kar chitthi es par

haath mein di....ja ' ja kar daina es akaash sawami ko

shaam ka chehra sawah hotay hotay wo bhaagi 

lekin raah mein

chaand nay hath maror k chitthi cheen li es se

raahu , keetu , bhaagay haath churanay es ka

shaam ka kangan sanka haath se , aur shani nay dor k kangan loot liya

barrbola "dumdaar sitara" mehwar mehwar shor machata bhaag gaya

sadiyon tak goonji thi phir wo baat ghamurti kaiynaat mein!

Sadiyon baad ki baat hai shayad

ya phir inhein dino ki hogi

waqt kharaon pehnay jab kuch sayaron par paon rakhta

kaiynaat se guzar raha tha

peepal ka aik patta urrtay urtay

es ki peeth se aa kar chipak gaya 

waqt nay apna rukh badla aur

parbat parbat paon rakhta neeche utra

raatk ki god mein shaam pari thi

darya lipta hua khara tha peepal se

aur pahar k seene par , pehli pehli ghaas ugi thi!!!

Ibtida..... Char

kaal maa choolay par haandhi rakh k , kab se bethi hai

kachay daanay gal jayein aur aik ubaala aa jaye!

ye bay sabra bacha betha.....

ungli rakh k gol katori k andar

gol gol thaali par tez ghumata hai

kaal kod rahay...

girah mandal se phir koi siyara urr kar

choolay mein na aan giray!

uff ye kaali kaiynaat ki haandi kab tak ublay gi!!!

Ibtida....Teen

maan choolay par bethi bail rahi thi kaal

kaal ki roti phoolay jab tak

bay sabra bacha...

thaali oondhi seedhi kar k

raat aur din , aur din aur raat hai , khel raha tha

haath se choo na jaye kaansi ka akaash

gir na jayein thaali se taaron k chawal

kaal maayi nay.... chaand katori rakh di eski thaali mein!!!

Ibtida.....Do

Saara angan duan duan tha

kaal maa choolay par kab se geeli lakri phoonk rahi thi

jab tak ye bay sabra bacha.....

duaein ka anchal khainch k sar par asman ko taan raha tha

zard ufaq ki choti pakray

neel samandar baandh raha tha

aur kaal maayi....

sookhay tinkay tor tor k , baalan ki wathiyon mein rakhti jati thi

choolay mein jab aag ka pair ugay ga , tab roti utray gi!!

Ibtida ..... Aik

La mehdood khla he khla

By ant samay

aur aag he aag...Duaan he duaan

aur gases saari kainaat mein

pal pal Nova phoot rahay they

sooraj aur siyaaray chatak kar

arbon kharbon meelon tak chingariyon jaisay urtay they

nayi nayi dunyaein murattab honay lagi thein

kaal maai nay

kainaat mein door daraz ki aik nawahi galaxy k

neelay rang k , gol se ik siyaaray par

ye keh kar khuda ko chor diya

bay sabra hai ye , jald bara ho jaye ga