Ikhtitam e December

Aao lipat jao  mere seene se k Ikhtitam e december hai

Kaheen ye sard hawa tumhein bemaar na kar day

Megha kalay , kalay megha

Megha kalay , kalay megha

Kahan kahan bhatkay phirtay ho

Kin sotan bharmaye li tum ko?

Dheela dheela khait gorr k

Aur biyaj pay beej utha k

Sonch rahay they sawan mein na aaye to bhaado aao gy

Door ufaq se aatay to daikha tha hum nay

Aur aakash pay chartay b daikha tha , koi laathi aur langot

Pehan k haank raha tha

Beech dagar mein kahan gaye tum , Kalay megha?

Kon they wo jo taaga bandh k nathni mein

Aur kaheen ko 'hainch' k ly gaye!

Jatay jatay , kalay megha , tum ne neeche daikha tha kya?

Mera gaaon wesay he sookha hai ab tak

Nadi to keech ki bheegi pagdandi lagti hai

Nayya kaisay thelein es mein?

Kunwan undelein nadya mein , ya nadya lawein kunwein k mukh tak

Dono piyasay ik doosray ka mun taktay hein!

Kalay megha

Chakki kya peesay , kya bantay

Aaata ly jata hai banya

'Dhanya' ko cho kar milta hai

'Punya' apni naslein ly kar

Khait ki mendh pay beth gayi hai

Bachay to ghar ki kheti hain , bandhwa rakh k

Joh ki tokri mil jati hai!

'Nain' ka chora baap k sang darya bunta hai

'Roopa' jangal mein sookhi lakri chunti hai

Tain nay ye b daikha ho ga

Shehar ko chapay marnay ki aadat hai , megha

Shehar daketi karay to bachay jaib mein bhar k ly jata hai

Bachay bik jatay hein jaisay rerhi par bhuttay biktay hein

Megha tum bin oonchi aatari daikh k ghan barsaty ho ab

Oonchay paharon ki barfon se kyun ja takratay ho ?

Ye barfein kab pighli hein

In k paon talay se paani behta hai jab

Mere gaon talak aatay aatay kuch log kadalon se

Kaat k ly jatay hein paani!

Mere khait ki piyas nahi jati megha

Kab tak aous ki boondon se mein apni piyasi khaiti senchun?

Megha kalay , Kalay megha!

Barish aati hai to

Baarish aati hai to mere shehar ko kuch ho jata hai

Teen ki chat , tharpal ka chajha , peepal , pattay , parnala

Sab bajnay lagtay hein

Tang gali mein jatay jatay

Cycle ka pahiya pani ki kuliyan karta hai

Baarish mein kuch lambay jo jatay hein qad b logon k

Jitnay ooper hein , Itnay he pairon k neeche pani mein 

Ooper wala tairta hai to neeche wala doob k chalta hai



Khushk tha to rastay mein tak tak chatri tek k chaltay they

Baarish mein aakash pay chatri tek k tip tip chaltay hein!

Barish hoti hai jab

Barish hoti hai jab

To in garay pathar ki deewaron par

Bheegay bheegay naqshay ban'ny lagtay hein

Hichki hichki barish tab pehchani si aik likhayi lagti hai

Barish kuch keh jati hai

Aisa he ashkon se bheega

Ik khat shayad , tum ne pehle daikha ho!

Sardi thy aur kohra tha

Sardi thy aur kohra tha aur

subah ki bas aadhi ankh khuli thi , aadhi neend mein thy

Shimla se jab neeche aatay

Aik pahari k konay mein

Bastay jitni basti thi aik

Batway jitna mandar tha

Sath lagi ik masjid , Wo b locket jitni

Neend bhari do banhon jaisay masjid k meenar

Galay mein mandar k

Do masoom khuda soye they

Aik boorhe jharnay k neeche!

Dono ik sarak k aar paar chal rahay hein hum

   Dono ik sarak k aar paar chal rahay hei hum!

Os taraf se osne kuch kaha jo mujh tak aatay aatay

Raastay k shor o ghul mein kho gaya

Mein ne kuch isharay se kaha magar

Chaltay chaltay dono ki nazar na mil saki

Ose mughaalta hai mein

Oski justaju mein hun

Mujhe ye shak hai ' wo kahin

Wo na ho' Jo mujh se chupta phirta hai!